நீங்கள் தேடியது "ஜெகன்மோகன் ரெட்டி"

திருப்பதி:

ஆந்திர மாநிலத்தில் ஜெகன்மோகன் ரெட்டி ஆட்சி காலத்தில் அதானி நிறுவனத்தில் இருந்து போடப்பட்ட சூரிய சக்தி மின் ஒப்பந்தங்களை ரத்து செய்யக்கோரி கவர்னர் அப்துல் நசீரிடம் ஆந்திர மாநில காங்கிரஸ் தலைவர் சர்மிளா மனு அளித்தார்.

இதைத் தொடர்ந்து அவர் அளித்த பேட்டியில் கூறியதாவது:-

ஜெகன் மோகன் ரெட்டி நன்கொடை வாங்கியதற்கும் அதானியிடம் லஞ்சம் பற்றி நேரடியாக பேசியதற்கும் ஆதாரங்கள் உள்ளன. லஞ்சம் வாங்குவதற்காகத்தான் ஜெகன் மோகன் ரெட்டி இந்த ஒப்பந்தங்களில் கையெழுத்திட்டுள்ளார்.

அவர் ஊழல் செய்யவில்லை என்றால் தனது பிள்ளைகள் மீது சத்தியம் செய்ய வேண்டும். இந்த விவகாரத்தில் அதானிக்கும் மோடிக்கும் முதல்-மந்திரி சந்திரபாபு நாயுடு பயப்படுவதால் நடவடிக்கை எடுக்கவில்லை. இவ்வாறு அவர் கூறினர்.

திருப்பதி:

சூரிய ஒளி மின்சார ஒப்பந்தம் பெற ஆந்திர மாநில முன்னாள் முதல் மந்திரி ஜெகன்மோகன் ரெட்டிக்கு அதானி அதிகபட்சமாக ரூ.1,750 கோடி லஞ்சம் கொடுத்ததாக அமெரிக்க குற்றப் பத்திரிகையில் பரபரப்பு தகவல் வெளியாகியுள்ளது.

குஜராத் மாநிலத்தை சேர்ந்தவர் கவுதம் அதானி (வயது 62). இவர் இந்தியாவின் 2-வது பணக்காரராகவும் உலக பணக்காரர்கள் பட்டியலில் 17-வது இடத்திலும் உள்ளார்.

துறைமுகங்கள், விமான நிலையங்கள், நிலக்கரி, மின் உற்பத்தி மற்றும் ரியல் எஸ்டேட் உள்ளிட்ட தொழில்களில் கவுதம் அதானி ஈடுபட்டு வருகிறார்.

இந்த நிலையில் கடந்த 2020-24 காலகட்டத்தில் அதிக விலைக்கு சூரிய ஒளி மின்சார வாங்கும் வகையில் விநியோக ஒப்பந்தங்களை பெறுவதற்காக ஆந்திரா, ஜம்மு-காஷ்மீர் சத்தீஸ்கர், ஒடிசா உள்ளிட்ட மாநிலங்களில் அரசு அதிகாரிகளுக்கு அதானி குழுமம் ரூ.2,200 கோடி லஞ்சம் கொடுத்ததாகவும், இதை மறைத்து அமெரிக்க நிறுவனங்களிடம் முதலீடு பெற்றதாகவும் அதானி குழுமம் மீது நியூயார்க்கில் உள்ள கோர்ட்டில் குற்றச்சாட்டு பதிவு செய்யப்பட்டது.

இதன் தொடர்ச்சியாக அதானி குழுமத்தின் தலைவர் கவுதம் அதானி மற்றும் அவரது உறவினர் சாகர் அதானி முன்னாள் சி.இ.ஓ. வினித் ஜெயின் உள்ளிட்ட 7 பேர் மீது லஞ்சம் மற்றும் கடன் பத்திர மோசடி தொடர்பான தனித்தனி வழக்குகளில் அமெரிக்க கோர்ட்டில் குற்றச்சாட்டு பதிவு செய்யப்பட்டுள்ளது. இந்த வழக்கில் அதானிக்கு அமெரிக்க கோர்ட்டு பிடிவாரண்டு பிறப்பித்துள்ளது.

இந்தியாவிலேயே அதிகபட்சமாக ஆந்திர மாநில முன்னாள் முதல் மந்திரி ஜெகன்மோகன் ரெட்டிக்கு ரூ.1,750 கோடி வரை அதானி லஞ்சம் கொடுத்ததாக அமெரிக்க குற்றப்பத்திரிக்கையில் தெரிவிக்கப்பட்டுள்ளது.

ஆந்திர மாநிலத்தில் ஜெகன் மோகன் ரெட்டி முதல் மந்திரியாக இருந்தபோது தன்னுடைய மின்சாரத்தை அதிக விலைக்கு வாங்கினால் ரூ.1,750 கோடி தருவோம் என அதானி சார்பில் தெரிவிக்கப்பட்டுள்ளது.

இந்த ஒப்பந்தத்தின் மூலம் மாநில அரசுக்கு ரூ.1.10 லட்சம் கோடி சுமை ஏற்படும். இது நஷ்டம் என்பது தெரிந்தும் ஜெகன் மோகன் ரெட்டி தனக்கு பல கோடி ரூபாய் வரும் என்று நோக்கத்தில் இந்த ஒப்பந்தத்தை நிறைவேற்றி உள்ளதாக தெரிவிக்கப்பட்டுள்ளது.

ஜெகன்மோகன் ரெட்டி முதல் மந்திரியாக இருந்தபோது தொழில் அதிபர்களை சந்திப்பது வெளிப்படையாக இருந்தது. இது பற்றி பேட்டியும் அளித்தனர்.

ஆனால் அதானிக்கும், ஜெகன்மோகன் ரெட்டிக்கும் சூரிய ஒளி மின்சாரம் ஒப்பந்தம் செய்வது தொடர்பாக கடுமையான நெருக்கம் இருந்துள்ளது. இதற்காக தாடேப்பள்ளியில் உள்ள அரண்மனையில் ஜெகன் மோகன் ரெட்டியை அதானி 3 முறை ரகசியமாக சந்தித்துள்ளார்.

இந்த சந்திப்பின்போது அவர்கள் நன்கொடை மற்றும் லஞ்ச பணம் குறித்து மறைமுக வார்த்தைகளால் பேசியுள்ளனர். இந்த சந்திப்புக்கு பிறகு அதானி நிறுவனத்துடன் ஒப்பந்தம் வேக வேகமாக நிறைவேறி உள்ளது.

மத்திய சூரிய சக்தி நிறுவனத்தில் இருந்து மின்சாரம் வாங்குவதற்கான முன் மொழிவு, அமைச்சர்களின் ஒப்புதல் மற்றும் ஒப்பந்தம் கையெழுத்து ஆகியவை அனைத்தும் சில நாட்களிலேயே நடந்து முடிந்துள்ளது.

கடந்த 2021-ம் ஆண்டு ஆகஸ்டு மாதம் ஜெகன்மோகன் ரெட்டியை அதானி சந்தித்து ரூ.1,750 கோடி வழங்குவது குறித்து விவாதித்துள்ளார். பின்னர் ஆந்திர அரசாங்கத்துடன் மின்சார கொள்முதல் ஒப்பந்தங்கள் கையெழுத்தானது.

இதன் மூலம் அதானி குழுமத்திற்கு 20 ஆண்டுகளில் 200 கோடி டாலர் நிகர லாபம் கிடைக்கும் என்று அமெரிக்க அறிக்கை கூறுகிறது.

இந்த ஒப்பந்தத்தின் மூலம் அதானியும் ஜெகன் மோகன் ரெட்டியும், அதிகளவில் ஆதாயம் அடைகிறார்கள். இந்தியாவில் மொத்தமாக அதானி நிறுவனம் ரூ. 2200 கோடி அளவுக்கு லஞ்சம் கொடுத்துள்ளது என்றால் அதில் அதிகபட்சமாக ஜெகன்மோகன் ரெட்டிக்கு தான் ரூ.1,750 கோடியை வழங்கி உள்ளது.

இந்த பணம் பரிமாற்றத்திற்கு பிறகு கிருஷ்ணா பட்டினம் துறைமுகத்தில் மாநில அரசின் பங்கை விற்க அமைச்சரவை முடிவு செய்துள்ளது.

அமெரிக்காவின் புலனாய்வு அமைப்புகள் இந்த மோசடியின் நுட்பமான அம்சங்களை கூட அம்பலப்படுத்தி உள்ளன.

லஞ்சம் கொடுப்பதற்காக யார் எப்போது எங்கே? எப்படி சந்தித்தார்கள் அவர்களுக்கு இடையே என்ன மாதிரியான கடித பரிமாற்றம் நடந்தது என்பதை வெளிப்படுத்தி உள்ளனர்.

அமெரிக்காவில் அமர்ந்து கொண்டு ஆந்திராவில் உள்ள தாடே பள்ளி அரண்மனையில் நடந்த கூட்டங்களின் சுருக்கத்தை அவர்கள் தங்கள் குற்ற பத்திரிக்கையில் குறிப்பிட்டுள்ளனர்.

இது போன்ற விசாரணை நடத்துவது எப்படி நிதி திட்ட முறைகேடுளை எப்படி அம்பலப்படுத்துவது என்பதற்கு இந்த விசாரணை ஒரு சிறந்த உதாரணம்.

ஆந்திராவில் ஆட்சியை இழந்த ஜெகன்மோகன் ரெட்டி தற்போது எதிர்க்கட்சித் தலைவர் பதவி கூட கிடைக்காமல் திண்டாடி வருகிறார். அவர் மீது மணல் மோசடி, மதுபான ஊழல் வழக்குகள் உள்ளன. அந்த வழக்குகளில் ஆஜராகாமல் இழுத்தடித்து வருகிறார்.

அமெரிக்க நிறுவனங்களிடம் இருந்து வசூலிக்கப்பட்ட நிதியில் இருந்து ரூ.1,750 கோடியை லஞ்சம் மற்றும் நன்கொடையாக பெறுவது மிகப்பெரிய குற்றத்தின் கீழ் கணக்கிடப்படுகிறது.

இந்த வழக்கில் ஜெகன் மோகன் ரெட்டி குற்றவாளியாக சேர்க்கப்பட்டுள்ளார் என்பது உண்மை. இதுவரை ஊழல் குற்றச்சாட்டுகளை சந்தித்து வரும் ஜெகன்மோகன் ரெட்டி அமெரிக்காவிலும் விசாரணையை சந்திக்க வேண்டும். குற்றம் நிரூபிக்கப்பட்டால் கடுமையான தண்டனைக்கு வாய்ப்பு உள்ளது என சட்ட வல்லுநர்கள் தெரிவித்துள்ளனர்.

ஜெகன்மோகன் ரெட்டி மீதான இந்த குற்றச்சாட்டு ஆந்திர மாநிலத்தில் பெரும் பரபரப்பை ஏற்படுத்தியது.

திருப்பதி:

ஆந்திர மாநிலம் குண்டூர் மற்றும் கடப்பா மாவட்டங்களில் 2 இளம் பெண்கள் கொடூரமாக கொலை செய்யப்பட்டனர். அவர்களின் குடும்பத்தினரை ஆந்திர மாநில முன்னாள் முதல் மந்திரி ஜெகன்மோகன் ரெட்டி நேரில் சந்தித்து ஆறுதல் கூறினார்.

அப்போது அளித்த பேட்டியில் அவர் கூறியதாவது:-

ஆந்திர மாநிலத்தில் தெலுங்கு தேசம் கட்சி ஆட்சிக்கு வந்த 4½ மாதங்களுக்குள் 77 பெண்கள் பலாத்காரம் செய்யப்பட்டுள்ளனர். 7 பெண் கொலைகள் மற்றும் 5 இளம் பெண்கள் தற்கொலைகள் செய்துள்ளனர். குற்றவாளிகளை கைது செய்யும் நடவடிக்கையில் அரசாங்கம் எந்தவிதமான நடவடிக்கையும் எடுக்கவில்லை.

இது போன்ற கேடுகெட்ட செயல்களில் ஈடுபடும் நபர்களுக்கு ஆளுங்கட்சி கேடயமாக விளங்குகிறது.

பாதிக்கப்பட்ட பெண்களின் குடும்பத்தினருக்கு அரசு சார்பில் நிதி உதவி வழங்க வேண்டும். எங்களுடைய கட்சி சார்பில் உயிரிழந்தவர்களின் குடும்பத்திற்கு நீதி வழங்கப்படும்.

சந்திரபாபு நாயுடு ஆட்சிக்கு வந்த பிறகு ஆந்திராவில் பெண்களுக்கு எதிரான பாலியல் வன்கொடுமைகள், கொலைகள் மற்றும் தற்கொலைகள் அதிகரித்துக் கொண்டே வருகிறது.

இது மாநிலத்திற்கு நல்லதல்ல. சில சம்பவங்களில் அரசாங்கம் நடவடிக்கை எடுக்க தயங்குவது அதிகாரத்தில் இருப்பவர்கள் எந்த தவறு செய்தாலும் மறைக்கப்படலாம் என்ற ஆபத்தான சூழ்நிலையை உருவாக்கி வருகிறது.

எங்களுடைய ஆட்சியில் திஷா செயலி மூலம் பெண்கள் பாதுகாப்பை உறுதி செய்தோம். இதன் மூலம் 1.56 கோடி அழைப்புகள் வரப்பட்டு 31 ஆயிரத்துக்கும் மேற்பட்ட பெண்கள் மற்றும் சிறுமிகள் காப்பாற்றப்பட்டனர். இதற்காக 19 தேசிய விருதுகளும் கிடைத்தது.

தற்போது காவல்துறை சிறந்து விளங்க முடியவில்லை. அதிகரித்து வரும் பெண்களுக்கு எதிரான குற்றச்சாட்டுகளுக்கு அமைச்சர்கள் பொறுப்பேற்க வேண்டும். அவர்கள் மக்களிடம் மன்னிப்பு கேட்க வேண்டும். இதுபோன்ற குற்றங்கள் மீண்டும் நடக்காது என்று உறுதி அளிக்க வேண்டும்.

இவ்வாறு அவர் கூறினார்.

ஆந்திர மாநில முன்னாள் முதல்-மந்திரி ஒய்.எஸ்.ராஜசேகர ரெட்டி, 2009-ம் ஆண்டு ஹெலிகாப்டர் விபத்தில் மரணம் அடைந்தார்.

அவருடைய மகன் ஜெகன்மோகன் ரெட்டி, கடந்த 2019-ம் ஆண்டு முதல் கடந்த மே மாதம்வரை, ஆந்திர மாநில முதல்-மந்திரியாக இருந்தார். ஒய்.எஸ்.ஆர்.காங்கிரஸ் தலைவராக இருந்து வருகிறார்.

ராஜசேகர ரெட்டியின் மகள் ஷர்மிளா, தெலுங்கானாவில் ஒய்.எஸ்.ஆர்.தெலுங்கானா என்ற தனிக்கட்சி நடத்தி வந்தார். இந்த ஆண்டு பாராளுமன்ற தேர்தலுக்கு முன்பு, தனது கட்சியை காங்கிரசுடன் இணைத்து விட்டார்.

அந்த கட்சியின் ஆந்திர மாநில தலைவராக நியமிக்கப்பட்டார். கடப்பா பாராளுமன்ற தொகுதியில் காங்கிரஸ் வேட்பாளராக போட்டியிட்டு தோல்வி அடைந்தார்.

ஆந்திராவில், ஜெகன்மோகன் ரெட்டியை எதிர்த்து அரசியல் நடத்தி வருகிறார்.

இந்நிலையில், தனது தங்கை ஷர்மிளாவுக்கு எதிராக தேசிய கம்பெனி சட்ட தீர்ப்பாயத்தின் ஐதராபாத் கிளையில் ஜெகன்மோகன் ரெட்டி வழக்கு தொடர்ந்துள்ளார்.

அதில் அவர் கூறியிருப்பதாவது:-

எனது சில சொத்துகளை அமலாக்கத்துறை முடக்கி வைத்துள்ளது. அதுதொடர்பான வழக்குகள் நிலுவையில் உள்ளன.

அந்த வழக்குகளின் முடிவை பொறுத்து, சரஸ்வதி பவர் அண்ட் இண்டஸ்ட்ரீஸ் நிறுவனத்தில் எனக்கும், என் மனைவி பாரதிக்கும் சொந்தமான பங்குகளை பிற்காலத்தில் தான் செட்டில்மெண்ட் மூலம் என் தங்கை ஷர்மிளா பெயருக்கு மாற்றுவதாக கடந்த 2019-ம் ஆண்டு ஆகஸ்டு 31-ந் தேதி ஷர்மிளாவுடன் புரிந்துணர்வு ஒப்பந்தம் செய்து கொண்டேன்.

இது, முற்றிலும் பாசம் மற்றும் அன்பின் காரணமாக செய்து கொள்ளப்பட்டது.

பின்னர், மாறிவிட்ட சூழ்நிலை காரணமாக, அந்த புரிந்துணர்வு ஒப்பந்தத்தை ரத்து செய்ய விரும்புவதாக ஷர்மிளாவுக்கு கடிதம் மூலம் தெரிவித்தேன்.

ஆனால், எங்களுக்கு அதிர்ச்சி அளிக்கும்விதமாக சரஸ்வதி பவர் நிறுவனத்தில் எனக்கும், என் மனைவிக்கும் சொந்தமான பங்குகள் ஷர்மிளாவின் பெயருக்கு வாரிய தீர்மானம் மூலம் சட்டவிரோதமாக மாற்றப்பட்டுள்ளன. அதுபோல், எங்கள் குடும்பத்துக்கு சொந்தமான கிளாசிக் ரியால்டி நிறுவனத்தின் ஒட்டுமொத்த பங்குகளும் எங்கள் தாயார் விஜயம்மா பெயருக்கு மாற்றப்பட்டுள்ளன.

ஷர்மிளா சிறிது கூட நன்றி இல்லாமலும், தன் சகோதரர் நலனில் அக்கறை இல்லாமலும் தொடர்ந்து செயல்பட்டு வருகிறார்.

மேலும், அரசியல்ரீதியாக எனக்கு எதிராக செயல்பட்டு வருவதுடன், உண்மையற்ற, பொய்யான அறிக்கைகளை பகிரங்கமாக வெளியிட்டு வருகிறார். அவரது செயல்பாடுகள், சகோதர-சகோதரிக்கு இடையிலான உறவை சீர்குலைத்து விட்டன. ஒரு அண்ணன், தனது தங்கை மீது வைத்திருந்த பாசம் அனைத்தையும் நீர்த்துப் போகச் செய்து விட்டது.

எங்களுக்கிடையே இனிமேல் பாசம் எதுவும் இல்லை. எனவே, புரிந்துணர்வு ஒப்பந்தத்தில் கூறியபடி, ஷர்மிளா பெயருக்கு பங்குகளை மாற்ற நான் விரும்பவில்லை என்று தெரிவித்துக் கொள்கிறேன்.

இவ்வாறு அவர் கூறியுள்ளார்.

இந்த வழக்கு, அடுத்த மாதம் விசாரணைக்கு வருகிறது.

திருப்பதி:

ஆந்திர மாநிலம் அமராவதியில் உள்ள தலைமைச் செயலகத்தில் ஆந்திர முதல்-மந்திரி சந்திரபாபு நாயுடு நிருபர்களிடம் கூறியதாவது:-

எந்த கோவிலாக இருந்தாலும் அந்த மரபுகளை அனைவரும் மதிக்க வேண்டும். ஜெகன்மோகன் ரெட்டியை யாரும் திருப்பதிக்கு போக வேண்டாம் என்று சொல்லவில்லை. திருப்பதிக்கு போகாததற்கு ஜெகன்மோகன் ஏதோ ஒரு சாக்கு சொல்லுகிறார்.

ஒவ்வொரு கோவிலுக்கும், மதத்திற்கும் ஒரு சம்பிரதாயம், கலாச்சாரம் உள்ளது. அந்த கடவுளின் பழக்க வழக்கங்கள் மற்றும் மரபுகளை அனைவரும் மதிக்க வேண்டும். கடவுள் மற்றும் சடங்குகளை விட யாரும் பெரியவர்கள் இல்லை.

ஏழுமலையான் கோவில் கிடைத்திருப்பது தெலுங்கு மக்களின் அதிர்ஷ்டம். இதற்கு முன்பு முதல்-மந்திரியாக நான் சென்றேன்.

இப்போது ஏன் போகக்கூடாது என்று ஜெகன்மோகன் ரெட்டி கூறுகிறார். இதற்கு முன்பு ஜெகன்மோகன் ரெட்டி விதிகளை மீறி திருப்பதிக்குச் சென்றார். பலர் நம்பிக்கை உறுதி கொடுத்துவிட்டு சென்றனர்.

இந்து மதத்தை மதிக்கும் திருப்பதியில் உள்ள விதிகளை ஏன் ஜெகன்மோகன் ரெட்டி பின்பற்றுவதில்லை?. லட்டுவில் கலப்படம் செய்யவில்லை என கூறுகிறார். நெய்யில் கலப்படம் செய்யப்பட்டது ஆய்வக அறிக்கையில் தெளிவாக உள்ளது. இருப்பினும் முழு விசாரணை செய்வதற்காக ஐ.ஜி. தலைமையில் விசாரணை குழு அமைக்கப்பட்டுள்ளது.

மேலும் ஆந்திர மாநிலத்தில் புதிதாக ஒரு சட்டம் கொண்டுவரப்பட உள்ளது. இதில் எந்த வழிபாட்டு தலமாக இருந்தாலும் , மசூதியாக இருந்தாலும், தேவாலயம், கோவிலாக இருந்தாலும் அந்தந்த வழிபாட்டு தலங்களில் அந்த மதத்தை சேர்ந்தவர்கள் மட்டுமே இனி பதவியில் இருக்க வேண்டும். கோவில்களில் இந்துக்களுக்கு மட்டுமே பதவி வழங்கப்படும்.

இவ்வாறு அவர் கூறினார். 

திருப்பதி:

திருப்பதி லட்டு தயாரிக்க ஜெகன்மோகன் ரெட்டி ஆட்சி காலத்தில் விலங்குகளின் கொழுப்பு கலந்த கலப்பட நெய்யை பயன்படுத்தியதாக சந்திரபாபு நாயுடு குற்றம் சாட்டினார்.

லட்டு விவகாரம் பக்தர்களிடம் கொந்தளிப்பை ஏற்படுத்தியது. இந்த நிலையில் ஒய்.எஸ்.ஆர் காங்கிரஸ் கட்சி தலைவரும், முன்னாள் முதல் மந்திரியுமான ஜெகன்மோகன் ரெட்டி திருப்பதியில் ஏழுமலையானை தரிசிக்க உள்ளதாக அறிவித்து இருந்தார்.

அவரது வருகைக்கு கடும் எதிர்ப்பு தெரிவித்து இந்து அமைப்புகள் சார்பில் பல்வேறு போராட்டங்கள் நடந்தன. இதனால் ஜெகன்மோகன் ரெட்டி திருப்பதி வருகையை தற்காலிகமாக ஒத்தி வைத்தார்.

இது குறித்து ஜெகன்மோகன் ரெட்டி கூறியதாவது:-

ஆந்திராவில் பேய்கள் ராஜ்ஜியம் நடந்து வருகிறது. லட்டு விவகாரத்தில் பா.ஜ.க. கண்ணை மூடிக்கொண்டுள்ளது.

ஒருபுறம் போலீசார் எங்கள் கட்சிக்காரர்கள் மீது வழக்கு போடுவோம் என்று மிரட்டி நோட்டீஸ் அனுப்புகின்றனர். இன்னொரு பக்கம் சந்திரபாபு நாயுடு தனது தவறுகளை மறைக்க அண்டை மாநில பா.ஜ.க.வினரை கொண்டு வந்து சட்டம் ஒழுங்கு பிரச்சனையை உருவாக்குகிறார்.

இது தவறான செயல். ஏழுமலையானை மதிக்கும் மற்றும் நேசிக்கும் நான் அங்கு சென்றால் சட்டம் ஒழுங்கு பிரச்சனை ஏற்படும் என்பதால் அங்கு செல்ல விரும்பவில்லை.

அதனால் எனது சுற்றுப்பயணத்தை ஒத்தி வைக்கிறேன். திருப்பதி செல்லும் பயண தேதியை பின்னர் அறிவிக்கிறேன்.

100 நாள் ஆட்சியில் நடந்த தோல்விகளை திசை திருப்பவும், மக்களின் கவனத்தை திசை திருப்பவும் லட்டு விவகாரத்தை சந்திரபாபு நாயுடு கையில் எடுத்துள்ளார்.

இவ்வாறு அவர் கூறினார்.

திருப்பதி லட்டு விவகாரம் தொடர்பாக பிரதமர் மோடிக்கு ஜெகன்மோகன் ரெட்டி கடந்த வாரம் கடிதம் எழுதினார். இதற்கு எந்தவித பதிலும் தெரிவிக்கப்படவில்லை.

இந்த நிலையில் லட்டு விவகாரத்தில் பா.ஜ.க கண்ணை மூடிக் கொண்டுள்ளதாக ஜெகன் மோகன் ரெட்டி கூறியிருப்பது ஆந்திர அரசியலில் பரபரப்பை ஏற்படுத்தியது.

ஆந்திராவின் முன்னாள் முதல்வர் ஜெகன் மோகன் ரெட்டி இன்று திருப்பதி செல்வதாக இருந்த பயணம் ரத்து செய்யப்பட்டுள்ளது.

இறை நம்பிக்கை படிவத்தில் கையெழுத்திட வேண்டும் என்ற சர்ச்சை எழுந்த நிலையில் பயணத்தை ஜெகன் மோகன் ரெட்டி ரத்து செய்துள்ளார்.

ஒய்எஸ்ஆர் காங்கிரஸ் கட்சியின் தொண்டர்களை, ஆந்திர அரசு மிரட்டுவதாக புகார் எழுந்துள்ளது.

ஆந்திரா அறநிலையத்துறை சட்டம் 136ன் கீழ், இறை நம்பிக்கை படிவத்தில் கட்டாயம் கையெழுத்திட வேண்டும் னெ திருமலையில் பிளக்ஸ் பேனர்கள் வைக்கப்பட்டுள்ளது.

இதற்கிடையே, ஜெகன் மோகன் ரெட்டி திருப்பதி வருவதையொட்டி, பலத்த போலீஸ் பாதுகாப்பு போடப்பட்டிருந்தது. கூடவே 144 தடை உத்தரவும் பிறப்பிக்கப்பட்டிருந்தது.

இந்நிலையில், திருமலையில் இந்து அல்லாதவர்களுக்காக ஏராளமான இடத்தில் பேனர்களுடன் அறிவிப்பு வைக்கப்பட்டுள்ள நிலையில் ஜெகன் மோகன் ரெட்டி பேட்டி அளித்துள்ளார்.

இதுகுறித்து ஜெகன் மோகன் ரெட்டி கூறியதாவது:-

திருப்பதி திருமலையில் பெருமாளை கும்பிட வந்தால் கைது செய்வீர்களா ? அது சட்டத்துக்கு புறம்பான செயல் என வர்ணிப்பீர்களா ?

நான் முதலமைச்சராகும் முன்பு ஏழுமலையானை வழிபட்ட பின்னரே பாத யாத்திரையை தொடங்கினேன்.

என்னுடைய மதம் என்ன என்று கேட்கிறார்கள். என்னுடைய மதம் மனிதாபிமானம், அதை டிக்ளரேஷன் படிவத்தில் எழுதிக் கொள்ளுங்கள்.

இறைவனை சந்தித்து வழிபட கூட இந்த ஆட்சி தடை விதக்க முயற்சிக்கிறது. எனது தந்தை முதல்வராக இருந்தபோது, 5 முறை ஏழுமலையானுக்கு பட்டு வஸ்திரம் சமர்பித்தார்.

நானும் முதல்வராக இருந்தபோது 5 முறை ஏழுமலையானுக்கு பட்டு வஸ்திரம் சமர்பித்தேன்.

திருப்பதிக்கு நான் பயணம் மேற்கொள்ள இருந்த அதே நேரத்தில் பஜாகவினரும் திருப்பதியிலு குவிந்து வருகின்றனர்.

நான் வீட்டில் பைபிள் வாசிக்கிறேன். இந்து, முஸ்லீம், சீக்கியம் என அனைவரையும் நான் மதிக்கிறேன்.

முதல்வராக இருந்த ஒருவரையே கோயிலுக்கு அனுமதிக்க மறுத்தால், தலித்களை எவ்வாறு நடத்துவார்கள்?

திருப்பதியில் 6 மாதத்திற்கு ஒரு முறை நெய் வாங்க டெண்டர் விடுவது வழக்கம். சந்திரபாபு நாயுடுவின் முந்தைய ஆட்சியில் 15 முறை டெண்டர் நிராகரிக்கப்பட்டுள்ளது. என்னுடைய ஆட்சி காலத்திலும் நெய்க்கான டெண்டர் 15 முறை நிராகரிக்கப்பட்டது.

இவ்வாறு அவர் குறிப்பிட்டுள்ளார்.

திருப்பதி:

ஆந்திர மாநிலத்தில் ஜெகன்மோகன் ரெட்டி ஆட்சி காலத்தில் திருப்பதியில் லட்டு செய்வதற்கான நெய்யில் விலங்குகள் கொழுப்பு கலக்கப்பட்டதாக முதல் மந்திரி சந்திரபாபு நாயுடு குற்றம் சாட்டியுள்ளார். இந்த குற்றச்சாட்டு பெரும் சர்ச்சையை ஏற்படுத்தியது.

சந்திரபாபு நாயுடு செய்த பாவத்தை போக்க ஆந்திரா முழுவதும் நாளை 28-ந் தேதி கோவில்களில் பரிகார பூஜை நடத்தி வழிபட வேண்டும் என ஜெகன்மோகன் ரெட்டி அழைப்பு விடுத்தார்.

இந்த நிலையில் ஜெகன்மோகன் ரெட்டி ஏழுலையான் கோவிலில் நாளை தரிசனம் செய்ய உள்ளதாக தெரிவித்தார். இன்று மாலை 5 மணிக்கு ரேணிகுண்டா விமான நிலையம் வருகிறார். அங்கிருந்து திருப்பதி மலைக்கு சென்று பத்மாவதி தாயார் விருந்தினர் மாளிகையில் இரவு தங்குகிறார்.

நாளை காலை 10.30 மணிக்கு ஏழுமலையானை தரிசிக்க ஜெகன்மோகன் ரெட்டி முடிவு செய்துள்ளார்.

ஜெகன் மோகன் ரெட்டி வருகைக்கு பா.ஜ.க. கடும் எதிர்ப்பு தெரிவித்தது. ஏழுமலையான் கோவில் விதிகளின் படி அவர் மாற்று மதத்திற்கான பதிவேட்டில் கையெழுத்திட்டு செல்வாரா? என கேள்வி எழுப்பியது.

இதற்கு பதில் அளித்துள்ள திருப்பதி தேவஸ்தான அதிகாரிகள் ஜெகன் மோகன் ரெட்டி மாற்று மதத்திற்கான பதிவேட்டில் கையெழுத்திட்டால் மட்டுமே கோவிலுக்குள் அனுமதிக்கப்படுவார் என தெரிவித்தனர்.

ஜெகன்மோகன் ரெட்டி வருகைக்கு எதிர்ப்பு தெரிவித்து நேற்று திருப்பதியில் பா.ஜ.க., ஆர்.எஸ்.எஸ். மற்றும் இந்து அமைப்புகளை சேர்ந்தவர்கள் ஏராளமானோர் ஒன்று கூடி போராட்டத்தில் ஈடுபட்டனர்.

அப்போது கோ பேக் ஜெகன்மோகன் என்றும் 5 ஆண்டுகளுக்கு ஜெகன்மோகன் ரெட்டியை திருப்பதி மலையில் கால் வைக்க விடமாட்டோம் என கோஷம் எழுப்பினர்.

ஜெகன்மோகன் ரெட்டி திருப்பதி மலைக்கு வருவதை தடுக்க ஆயிரக்கணக்கான இந்து அமைப்பை சேர்ந்தவர்கள் அலிபிரி சோதனை சாவடியில் குவிந்து வருகின்றனர்.

இதே போல் ஒய்.எஸ்.ஆர். காங்கிரஸ் கட்சி தலைவர்கள், தொண்டர்கள் ஏராளமானோர் திருப்பதியில் குவிந்து வருகின்றனர்.

ஜெகன்மோகன் ரெட்டி திருப்பதி மலைக்கு செல்லும் வரை தங்களது போராட்டம் தீவிர படுத்தப்படும் என ஒ.எஸ்.ஆர் காங்கிரஸ் கட்சியினர் தெரிவித்தனர்.

திருப்பதி நகர எல்லைகளில் போலீசார் சோதனை சாவடிகளை அமைத்து வாகனங்களில் வரும் ஒய்.எஸ்.ஆர் காங்கிரஸ் கட்சியினரை திருப்பி அனுப்பும் பணியில் ஈடுபட்டு வருகின்றனர்.

ஜெகன்மோகன் ரெட்டி திருப்பதி மலைக்கு வருவதால் கலவரம் ஏற்பட்டு சட்டம் ஒழுங்கு பாதிக்கப்படும் என தெரிய வந்துள்ளது.

ரேணிகுண்டா விமான நிலையத்தில் ஜெகன்மோகன் ரெட்டியை தடுத்து நிறுத்தி சட்டம் ஒழுங்கு பிரச்சனையை காரணம் காட்டி திருப்பி அனுப்ப போலீசார் முடிவு செய்துள்ளனர்.

திருப்பதியில் இந்து அமைப்பை சேர்ந்தவர்களும் ஒய்.எஸ். ஆர். காங்கிரஸ் கட்சியை சேர்ந்தவர்களும் ஏராளமானோர் குவிந்து வருவதால் பதற்றமான சூழ்நிலை நிலவி வருகிறது.

அசம்பாவித சம்பவங்களை தவிர்ப்பதற்காக ஆயிரக்கணக்கான போலீசார் குவிக்கப்பட்டு உள்ளனர்.

இதனால் திருப்பதியில் தரிசனத்திற்கு வந்த பக்தர்கள் கடும் சிரமத்தை சந்தித்து வருகின்றனர்.

திருப்பதியில் பிரசாதமாக வழங்கப்படும் லட்டில் நெய்க்கு பதிலாக விலங்குகளின் கொழுப்பை ஜெகன்மோகன் ரெட்டி அரசு கலந்ததாக குற்றம் சாட்டப்படுகிறது. இதற்கான ஆதாரங்களும் வெளியிடப்பட்டதால் பெரும் பரபரப்பு ஏற்பட்டுள்ளது.

இந்த நிலையில் ஆந்திர முன்னாள் முதல்-மந்திரி ஜெகன்மோகன் ரெட்டி மீது போலீசில் புகார் அளிக்கப்பட்டுள்ளது. ஐதராபாத்தை சேர்ந்த வக்கீல் கருணாசாகர் சைதாபாத் போலீஸ் நிலையத்தில் கொடுத்துள்ள புகாரில் கூறப்பட்டு இருப்பதாவது:-

கலப்பட நெய் விவகாரம் குறித்து போலீசார் விசாரணை நடத்த வேண்டும். திருப்பதி கோவிலின் புனிதத்துக்கு களங்கம் ஏற்படுத்தியதற்காகவும், இந்துக்களின் உணர்வுகளுக்கு பாதிப்பை ஏற்படுத்தியதற்காகவும் முன்னாள் முதல்-மந்திரி ஜெகன்மோகன் ரெட்டி மீது நடவடிக்கை எடுக்க வேண்டும்.

இவ்வாறு அதில் குறிப்பிடப்பட்டுள்ளது.

திருப்பதி:

திருப்பதி கோவிலில் ஆந்திரா முன்னாள் மந்திரி ரோஜா நடிகை ரவளியுடன் வந்து தரிசனம் செய்தார்.

நான் ஒய்.எஸ்.ஆர். காங்கிரஸ் கட்சியில் இருந்து விலகப் போவதாக சிலர் சமூக வலைதளங்களில் தவறாக பதிவிட்டு வதந்தி பரப்பி வருகின்றனர்.

நான் எந்த காரணத்தைக் கொண்டும் கட்சி மாற மாட்டேன். சிலர் கட்சியில் இருந்து வெளியேறுவதால் ஜெகனுக்கோ, ஒய்.எஸ்.ஆர் காங்கிரஸ் கட்சிக்கோ எந்த இழப்பும் இல்லை.

கட்சிக்கு துரோகம் செய்பவர்களை மன்னிக்க முடியாது. அவர்களது நிலைமையை தற்போது பார்த்து வருகிறோம். ஆந்திராவில் பெண்களுக்கு பாதுகாப்பு இல்லை.

கல்லூரி கழிவறையில் ரகசிய கேமரா, பெண்கள் மீதான தாக்குதல், ராக்கிங் போன்ற சம்பவங்கள் தொடர்ந்து நடந்து வருகிறது. சந்திரபாபு நாயுடு ஆட்சியில் சட்டம்-ஒழுங்கு சீர்குலைந்து உள்ளது.

இவ்வாறு அவர் கூறினார். 

திருப்பதி:

ஆந்திராவில் கடந்த 2017-ம் ஆண்டில் சந்திரபாபு நாயுடு ஆட்சியின் போது மதுபான கடைகள் தனியார் வசம் இருந்தது.

அதன் பிறகு ஆட்சிக்கு வந்த முதல் மந்திரி ஜெகன்மோகன் ரெட்டி மதுபான கடைகளை அரசு மதுகடைகளாக மாற்றினார்.

சந்திரபாபு நாயுடு முதல் மந்திரியாக பொறுப்பேற்ற பிறகு புதிய மதுபான கொள்கைகளை அமல்படுத்த முடிவு செய்தார்.

அதன்படி கலால் துறை அதிகாரிகள் தமிழ்நாடு, தெலுங்கானா, கேரளா, கர்நாடகா, மகாராஷ்டிரா உள்ளிட்ட 6 மாநிலங்களில் மதுபான கொள்கை குறித்து ஆய்வு செய்து அரசிடம் அறிக்கை சமர்ப்பித்தனர்.

அதில் தெலுங்கானாவில் தனியார் வசம் உள்ள மதுபான கடைகள் மூலம் அரசுக்கு அதிக அளவில் வருவாய் கிடைப்பது தெரியவந்தது.

இதனால் தெலுங்கானா மதுபான கொள்கையை பின்பற்ற முதல் மந்திரி சந்திரபாபு நாயுடு தலைமையிலான அமைச்சரவை கூட்டத்தில் ஒப்புதல் வழங்கப்பட்டது.

அதன்படி செப்டம்பர் மாத இறுதியில் ஆன்லைன் மூலம் மதுபான கடைகள் குலுக்கல் முறையில் தேர்ந்தெடுக்கப்பட உள்ளன.

மதுபான கடைக்கு விண்ணப்பம் செய்ய ரூ.2 லட்சம் கட்டணம் நிர்ணயிக்கப்பட்டுள்ளது. ஒவ்வொரு கடைக்கும் 40 விண்ணப்பங்கள் வரை வரும் என எதிர்பார்க்கப்படுகிறது. இதன் மூலம் அரசுக்கு ஆண்டுக்கு ரூ.2000 கோடி வருவாய் கிடைக்கும் என அதிகாரிகள் தெரிவித்தனர்.

கடந்த ஆட்சியில் அரசு மதுபான கடை என்பதால் அருகில் பார் வைக்க அனுமதி கொடுக்கவில்லை. இதனால் மது குடிப்பவர்கள் சாலைகளில் மது குடித்துவிட்டு தகராறில் ஈடுபட்டு வந்தனர்.

தற்போது மதுக்கடைகள் தனியார் வசம் ஒப்படைக்கப்பட உள்ளதால் மது கடையுடன் கூடிய பார் அமைத்துக் கொள்ள அனுமதி வழங்கப்பட உள்ளதாக ஆந்திர மாநில கலால் துறை அதிகாரிகள் தெரிவித்தனர். 

விஜயவாடா:

ஆந்திராவில் பாராளுமன்ற தேர்தலுடன் நடந்த சட்டமன்ற தேர்தலில் தெலுங்குதேசம் கட்சி கூட்டணி அபார வெற்றி பெற்று சந்திரபாபுநாயுடு முதல்-மந்திரி ஆனார். ஜெகன்மோகன் ரெட்டி தலைமையிலான ஒய்.எஸ்.ஆர்.காங்கிரஸ் கட்சி படுதோல்வியை அடைந்தது.

ஜெகன்மோகன் ரெட்டி மந்திரி சபையில், நடிகை ரோஜா விளையாட்டுத்துறை மந்திரியாக இருந்தார். அந்த காலக்கட்டத்தில் மாநிலம் முழுவதும் விளையாட்டு போட்டி நடத்த ரூ.110 கோடி ஒதுக்கப்பட்டது. இதில் பெரிய அளவில் ஊழல் நடந்ததாக அப்போதே எதிர்க்கட்சிகள் குற்றம் சாட்டின.

இதற்கிடையே இந்த போட்டி நடத்தியதில் நடிகை ரோஜா ரூ.100 கோடி ஊழல் செய்ததாக விளையாட்டு அமைப்பு ஒன்றின் தலைவர் பிரசாத் மாநில அரசுக்கு கடந்த ஜூன் 11-ந்தேதி புகார் செய்தார். இந்த புகாரின் பேரில் விசாரணை நடத்த விஜயவாடா போலீஸ் கமிஷனருக்கு அரசு உத்தரவிட்டு உள்ளது.

விளையாட்டு கருவிகள் வாங்கியது, வெற்றி பெற்றவர்களுக்கு பரிசு வழங்கியது இப்படி அனைத்து விஷயங்களையும் தீவிரமாக விசாரணை செய்து அறிக்கை அளிக்கும்படி உத்தரவிட்டு இருப்பதாக விஜயவாடா போலீஸ் கமிஷனர் தெரிவித்தார். இந்த வழக்கு தொடர்பான விசாரணைக்கு ரோஜா அழைக்கப்படுவார் என்று தெரிகிறது.